Vieiros

Vieiros: Esperaba gañar estes dous premios?

Diana Varela: Non, non o esperaba. Colleume de sorpresa. Era o primeiro ano que mandaba parte do meu poemario a un certame e non esperaba que fose gañar os dous premios.

V: Como reaccionou o seu círculo de amigos e a súa familia ao coñecer que gañara os premios?

R: Foi unha sorpresa grandísima e tamén unha enorme ilusión. A xente que me coñece de sempre sabe cal é a vital importancia que ten para min a poesía.

V: Canto tempo leva escribindo?

R: Levo escribindo dende hai moitos anos. Como case todo o mundo, dende moi nova. A nivel escolar, escribo dende sempre, pero nunca fixera nada máis en serio ou conscientemente até agora.

V: Cales son os temas que trata a súa obra?

R: Este poemario xira en torno a tres eixes, ou polo menos iso é o que me dá a impresión a min, porque me resulta difícil falar da miña propia obra. Dáme a sensación de que trato moito a autopoética, tamén o amor e o desamor e por último a infancia, como parte dun proceso que desemboca, así mesmo, na autopoética. Os tres eixes están intimamente relacionados.

V: Vai seguir publicando poesía?

R: Si, seguirei traballando, que é do que se trata. A poesía non é algo que se decide comezar ou rematar. A obra vaise publicar porque unha parte do premio era precisamente esa, a publicación do traballo gañador.