Vieiros

As dúas primeiras xuntanzas serán nos meses de marzo e abril e responden ás recomendacións ao respecto da chamada comisión Baker-Hamilton, que reuniu recentemente a republicanos e demócratas para redeseñar a estratexia dos EUA cara a Iraq.

A secretaria de Estado dos EUA, Condoleeza Rice, confirmou este mércores ese encontro, subliñando que será unha oportunidade para a diplomacia e para "mellorar as relacións entre veciños". Indicou Rice que o vencello entre Siria e Irán con Iraq contribuirá a abrir camiño pola paz e a estabilidade na rexión.

Mentres, nos Estados Unidos, o diario Washington Post e a cadea de televisión ABC publicaban este martes unha sondaxe que valora a opinión dos estadounidenses sobre o papel do seu país en Iraq. Segundo eses datos, o 53% dos cidadáns opina que o goberno Bush debera poñer xa un prazo concreto para a saída de Iraq das tropas. Ademais, o 56% dos entrevistados afirmou estar en contra do plan do goberno para enviar 21 mil soldados máis a Iraq. Un 24% afirmou que en seis meses todos os soldados estadounidenses deberían estar de volta nos EUA. A desaprobación sobre a xestión que Bush fai da xestión en Iraq chega xa ao 67%.