Vieiros

A convocatoria está aberta para formacións musicais galegas, de calquera estilo, en dúas modalidades: A, enfocada a formacións de pequeno formato, de creación recente ou con menos presenza no mercado, e B, para grupos cunha traxectoria xa consolidada. Unha Comisión de Selección, formada por dous representantes da Dirección Xeral de Creación e Difusión Cultural, dous do IGAEM e catro persoas de recoñecido prestixio no ámbito da música, escollidas por Clubtura, reunirase unha ou dúas veces ao ano para faceren unha preselección de cincuenta grupos A e vinte grupos B. Na modalidade B, un 25% dos grupos poderán ser de fóra da Comunidade Autónoma Galega. Os criterios fundamentais para a escolla son a residencia en Galiza, ou o vencello (emigración, uso da lingua), o oportuno do momento (en casos de lanzar novo disco, estreas), a calidade e traxectoria da formación, e pluralidade estilística e lingüística, con especial atención á presenza e promoción do galego.

Cada un dos grupos contratados terá un mínimo de dez concertos dentro da Rede Galega de Música ao Vivo, e quedan fóra do período de programación os meses de xullo, agosto e setembro. Cada sala contratará, como mínimo, a cinco grupos do tipo A e dous consolidados no período de xaneiro a xuño, e En canto aos cachés, os grupos de tipo A poderán cobrar 240 € por concerto, e os de tipo B, 800. En ambos casos, o IGAEM subvenciona o 75% e a sala pon o resto. Os prezos de entrada estarán, no caso dos grupos A, nun mínimo de un euro, e no dos grupos B, en tres.