Vieiros

En Ferrol, o venres ás oito e media represéntase La casa de Bernarda Alba, de Federico García Lorca, no Teatro Jofre. A posta en escena corre a cargo da compañía Entrecajas Producciones e Teatro de la Danza. Esta mesma obra vaise representar en Vigo, na sala de concertos do Centro Cultural Caixanova, o sábado e o domingo, tamén ás 20:30. O sábado, en Pontevedra, tamén se vai representar unha obra de Federico García Lorca, pero neste caso será Así que pasen 5 anos, de Sarabela Teatro. A cita, ás oito no Teatro Principal, dentro da segunda edición do Brumario Poético.

Durante a fin de semana tamén haberá ópera: o Teatro da Ópera e Ballet Estatal de Jarkov (Ucraína), subirá o venres ás nove da noite ao escenario do Auditorio Municipal de Ourense para interpretar Don Giovanni, de Mozart. O sábado, á mesma hora, estará no Pazo da Cultura de Pontevedra.
A comedia e os contos estarán presentes en Pontevedra, grazas a Serxio Pazos, que actúa o venres ás once da noite no Pub Embrujo, e a Cándido Pazó, que estará o sábado ás dez na Sociedade Cultural e Deportiva de Mourente.

Na Coruña, o Teatro Rosalía de Castro acollerá o sábado ás oito o festival folclórico dos XV Premios IAR, mentres que o domingo ás 20:30 a compañía Experimenta Danza ofrecerá alí o seu espectáculo Meltemi. En Lugo, o venres ás oito e media, no Auditorio Gustavo Freire, o Centro Dramático Galego representa O regreso ao deserto. O domingo, á mesma hora e no mesmo lugar, será a quenda da compañía vasca Vaivén Producciones coa obra Nasdrovia Chejov, pola que recibiu un premio MAX. Mentres, en Compostela, seguen en escena O Alemán, na sala Nasa, e Edipo, na Yago.