O historiador Alfredo Erias amosa no compostelán colexio de Fonseca até o 25 de xaneiro a exposición Xente no Camiño. Nela recóllese a visión do autor sobre a vida na Baixa Idade Media a través de 54 cadros nos que se combinan imaxes de bispos, reis, raíñas e cabaleiros. Nas imaxes, de vivas cores, represéntanse figuras enmarcadas en arcos de medio punto, o que lles dá o aspecto de retablos. Alfredo Erias é pintor, debuxante, gravador e responsábel da revista Anuario Brigantino e mais do Arquivo e Biblioteca Municipais de Betanzos e do Museo das Mariñas. A colección está patrocinada pola Deputación Provincial da Coruña e a Universidade de Santiago.