Vieiros

Nesta festa de exaltación do amor cristián, heterosexual, dunha parella con plans de matrimonio e orientada a crear unha familia, o mundo occidental tende, como con moitas outras celebracións, a buscar no consumismo e nos tópicos os recursos lúdicos: levar algunha prenda vermella para demostrar que se está namorado, enviar postais ou "valentinas", e, sobre todo, mercar agasallos para a parella ou a persoa amada. Isto ás veces carrexa o consumismo desaforado, sen termos en conta de onde veñen os produtos que mercamos. Neste día hai varias campañas para tomarmos conciencia.

No diario arxentino Clarín cóntannos como a febre do Día dos Namorados chega á rede: as tendas online venden flores e lencería erótica comestíbel, pero tamén presentes alternativos, como a posibilidade de rexistrar unha estrela co nome do namorado. Tamén hai recursos en liña para namorados, como poemas en varios idiomas. Non atopamos webs específicas en galego, pero podedes documentarvos cos nosos autores na Biblioteca Virtual, ou ser máis orixinais e escribirdes un de voso.

Máis extremistas son no Reino Unido, que celebra á vez o Día de San Valentín e o Día Nacional da Impotencia. Perante a alerta sobre as ventas de Viagra sen receita, as autoridades sanitarias volven advertir sobre os perigos desta medicación. E para os pouco previsores, o sitio Last Minute permite imprimir un certificado que acredita que, aínda que non haxa agasallo, a intención de mercalo existía. Se aínda vamos máis alá e queremos evitar a toda costa a celebración, a empresa Alibi Network organízanos a coartada por 35 dólares: a compañía encárgase de enviar un correo electrónico avisando dunha reunión fóra da cidade ou calquera outra escusa para fuxirmos do Día dos Namorados.