Vieiros

Versos a 25 fotogramas por segundo. A tecnoloxía posibilita novas canles e formas de expresión para a poesía. Autoras como María Lado, Antía Otero e máis Sara Jess, que prefire ser coñecida por este seu pseudónimo cibernético, teñen unha actividade regular na rede por medio de cadanseu blog. A fotografía, o deseño gráfico, o son e o vídeo son ferramentas importantes no seu traballo creativo.

Ao longo desta xornada poderemos ver O vídeo da egoísta, de Yolanda Castaño; vídeo gañador do Festival de Curtametraxes do Concello de Santiago Compostela Curtocircuíto 2004 na sección de videocreación; o documental Os ollos da cidade, de Lara Bacelo; A miña vida é unha caixa de zapatos, do que Ledicia Costas é protagonista e realizadora; Extremas e Sombras 06 de María Lado, e tamén traballos de Antía Otero, e Estevo e David Creus. O día rematará cunha festa recital no Jazz Club Night and Day ás 23.30, cita na que tamén participarán Pepa Yáñez e Davide Salvado, Lucía Aldao e Estíbaliz Espinosa.