Vieiros

"O test electoral celebrado entre o pasado 14 e 21 de marzo determinará a evolución do panorama político francés de cara aos comicios presidenciais de 2012, onde o mandatario Sarkozy espera postularse para a reelección", consideran desde o Igadi.

O último número do Igadi Paper, o instrumento de análise e información do Instituto Galego de Análise e Documentación Internacional, "destinado a afondar de forma equilibrada e sintética nalgún conflito, acontecemento ou tendencia internacional de relevancia e actualidade", debulla as pasadas eleccións rexionais en Francia.

Consideran que o Partido Socialista (PS) se converteu no "gran protagonista" destes comicios, logo de lograr perto do 30% dos votos a nivel individual, que se incrementou até o 54,3% após se concretar unha alianza con outros partidos de esquerda na segunda volta.

Ademais, tamén botan o ollo ao avance dos movementos nacionalistas e autonomistas, que segundo o Igadi podería contribuír a abrir o debate constitucional para avanzar na "descentralización administrativa" e no "recoñecemento dos dereitos lingüísticos e culturais das consideradas 'nacións sen Estado', como son os casos corso, occitano e bretón".