Vieiros

O vindeiro xoves será o 125 cabodano da morte de Rosalía de Castro. A autora converteuse nun dos principais referentes da nosa literatura, a súa sobresaínte obra poética é recoñecida alén das nosas fronteiras. Mais a escritora que logrou o aplauso unánime da crítica foi tamén, diante de todo, admirada polo mesmo pobo do que beberon tantos dos seus poemas.

Máis aló dos actos institucionais, a efeméride non pasou desapercibida no mundo escolar. Unha fermosa iniciativa é a que puxo en marcha o instituto de secundaria Ribeira do Louro (O Porriño). A súa revista Órbita dedícalle tres páxinas a Rosalía. Os protagonistas son os alumnos de bacharelato que escolleron e comentaron diferentes pezas da obra 'Follas Novas'.

Todo un convite a reler unha obra que tantos anos despois segue a mostrar a súa extraordinaria vizosidade.