Vieiros

"Pode tratarse dun dos asentamentos de meirandes dimensións da Mariña lucense, que se estende cara ao mar, cara a terreos de dominio público marítimo terrestre, polo que podería dar lugar a un gran proxecto arqueolóxico". A valoración xa a facía o propio informe dos técnicos de patrimonio, da que Vieiros lles contou hai semanas, mais non é até o de agora que a Xunta asume publicamente as conclusións dos investigadores.

A Dirección Xeral de Patrimonio resolve así que os restos achados do castro de Punta Atalaia, no concello de Cervo, "deben ser conservados in situ debido ao seu valor arqueolóxico e histórico". Un estudo onde se sinala que os restos exhumados evidencian unha complexidade urbanística froito dunha longa e continuada ocupación e transformación deste espazo, "que está na orixe da vila de San Cibrao". "Na súa orixe é adscribíbel ao período galaico-romano, no cambio de era e primeiros séculos despois de Cristo, á que se superpoñen estruturas medievais", indícase.

"A conservación dos restos é incompatíbel cos proxectos construtivos que se proxectaban sobre esta área", indica a Xunta. "Foron estas actuacións, en concreto a construción dun edificio na zona, as que nun primeiro momento confirmaron a existencia de restos arqueolóxicos, e conduciron a unha prospección máis en profundidade das zonas que aínda non se viran afectadas", refire o departamento nun comunicado.