Vieiros

A creación dun corpo policial verdadeiramente autónomo e de carácter galego segue a ser unha quimera 29 anos despois da aprobación do Estatuto. Mentres que en Euskadi e Catalunya a Ertzaintza e os Mossos de Esquadra xa controlan a maior parte do territorio que lles corresponde, Galiza segue co seu raquítico modelo e subalterno de unidades adscritas.

Dende 1991, grazas a un acordo, o goberno español presta axentes dos seus propios corpos que dependen administrativamente de San Caetano. Este mesmo luns, o xornal Faro de Vigo publica que na actualidade esta unidade adscrita só conta con 372 policías (60 menos ca en 2008) a razón estaría relacionada con cuestión estritamente monetarias. O executivo estatal pídelle á Xunta que pague a metade do gasto de nóminas, algo ao que esta se nega.

Con algunhas diferenzas internas, socialistas e nacionalistas pactaran durante o bipartito darlle pulo a unha verdadeira Policía Autonómica. O obxectivo era que esta unidade estivese a pleno rendemento en 2015, con catro mil axentes en activo en diferentes comarcas do país. Porén, poucas semanas despois da volta do PPdeG ao poder, dende a Xunta deixaron claro que a creación dunha policía autóctona quedaba en suspenso e non se establecían novas datas.