Vieiros

O premio á edición histórica, para Sabino Torres Ferrer, responsábel de Hipocampo Amigo e fundador da colección de poesía Benito Soto (1949). Víctor F. Freixanes, director da Editorial Galaxia e pontevedrés da Moureira como don Sabino, realizou a laudatio da traxectoria profesional do máis veterano dos editores galegos en activo. O alcalde de Pontevedra, Miguel Ángel Lores foi o encargado de realizar a entrega. Tamén lle foi concedido o título de Presidente de Honra da AGE a Isaac Díaz Pardo, de mans da concelleira de Cultura Ánxela Bugallo e logo dunha laudatio de Fran Alonso.

Os finalistas
Para o Ánxel Casal competían con Rivas Feísmo. Destruír un país. A fin do territorio humanizado, de Antón Baamonde e outros (Difusora de letras); O bosque dos raposos aforcados de Aro Paasilina (Rinoceronte); O suxeito postmoderno de Rebeca Baceiredo (Galaxia); e Terra e nostalxia. Galicia rural de Gwendolyn Luo (Baía). En canto ao Isaac Díaz Pardo da ilustración, as outras candidatas á parte de Smara eran A banda de Vilacendoi de Xulio Gayoso (Kalandraka); A lingua das bolboretas de Manuel Rivas, ilustrado por Miguelanxo Prado (Galaxia); Arquitectura popular de Galicia de Pedro de Llano, con fotografías de Juán Rodríguez e debuxos de Alfonso Salgado (Xerais); Carrilanos de Rafael Cid (Xerais); Cogumelos de Galicia de Carlos Silvar, Marisa Castro e V. L. Román (A Nosa Terra); e O pirata metepata de Toño Núñez (Baía).

As finalistas ao premio Xosé Neira VIlas ao libro infantil e xuvenil xunto coa novela de An Alfaya eran Corre, corre, cabaciña de Eva Mejuto (OQO); Corredores de sombra de Agustín Fernández Paz (Xerais) e Sari, soñador de mares de Marcos Sánchez Calveiro (Tambre).

Ao Francisco Fernández del Riego, que recoñece o apoio ao labor editorial e finalmente gañou o programa televisivo 'Libro aberto', optaban Biblos Clube de Lectura e o Salón do Libro Infantil e Xuvenil de Pontevedra. Entre os autores candidatos ao premio Xosé María Álvarez Blanco, ademais do premiado Rivas, estaban Teresa Moure e a Área de Terminoloxía do Servizo de Normalización Lingüística da USC.

Cultura, normalización, modernidade
O presidente da AGE, Alfonso García Sanmartín, gabou no seu discurso a lei do libro, por recoñecelo como elemento identificador de Galiza e afirmar o seu carácter estratéxico e prioritario "pola súa importancia cultural, social e económica e como instrumento de normalización lingüística; como garante do dereito á creación, á promoción e á divulgación da cultura, a historia e a lingua de Galicia". lembrou como esta lei camiña tamén na vía da renovación tecnolóxica e a modernización da industria do libro e das estruturas de distribución. "Iso define o novo reto: libro igual a cultura, normalización, industria, comercio, renovación tecnolóxica; libro igual a ben social e dereito cultural de todos os galegos e galegas".